Ársskýrsla Fræðslumiðstöðvar atvinnulífsins (FA) fyrir árið 2025 er komin út á rafrænu formi. Í árskýrslunni er farið yfir starfsemi FA og árangur starfsins á árinu.

Árið 2025 hjá FA einkenndist af mikilli eftirspurn eftir símenntun, fjölgun í námi og breyttum nemendahópi. Þátttaka í námi jókst um 9% milli ára og alls luku 2.934 einstaklingar námi árið 2025. Þróunin endurspeglar aukna eftirspurn eftir sveigjanlegu námi sem tengist beint störfum og atvinnuþátttöku. Erlendir ríkisborgarar eru nú meirihluti þátttakenda, eða 56%, sem undirstrikar mikilvægi aðgengilegra og fjölbreyttra náms.

Samhliða þessu hefur áhersla færst í auknum mæli yfir á starfstengt nám sem nú er stærsti flokkur náms. Nemendur sækjast í síauknum mæli eftir námi sem skilar beinum ávinningi á vinnumarkaði.

Ráðgjöf og raunfærnimat lykilþættir

Ráðgjöf um nám og störf var áfram mikilvægur þáttur í starfseminni, með 8.876 viðtölum á árinu. Raunfærnimat gegndi einnig mikilvægu hlutverki við að gera færni einstaklinga sýnilega og stytta leiðir í nám, en 557 einstaklingar nýttu sér það árið 2025.

Á sama tíma má greina breytingu í nýtingu verkfæra framhaldsfræðslunnar. Þátttaka í námi jókst á kostnað ráðgjafar og raunfærnimats. Sú þróun bendir til þess að einstaklingar nýti mismunandi leiðir eftir stöðu sinni og markmiðum.

Framhaldsfræðslan í sókn – en fjármögnun situr eftir

Ljóst er að framhaldsfræðslukerfið gegnir sífellt mikilvægara hlutverki á breytilegum vinnumarkaði en stendur jafnframt frammi fyrir verulegum áskorunum, einkum þegar kemur að fjármögnun.

Fjármagn Fræðslusjóðs var fullnýtt á árinu. Rúmlega milljarði króna var úthlutað til náms, ráðgjafar, raunfærnimats og þróunarverkefna, en það dugði ekki til að mæta allri eftirspurn.

Þetta undirstrikar stærstu áskorun framhaldsfræðslukerfisins: skort á nægu og stöðugu fjármagni til að mæta vaxandi þörf samfélags og breytilegum kröfum vinnumarkaðar.

Þróun og sterkari tenging við atvinnulíf

FA hélt áfram að þróa lykilverktæki framhaldsfræðslunnar, svo sem hæfnigreiningar starfa, námskrár og Fagbréf atvinnulífsins. Aukin áhersla er lögð á að tengja hæfniþarfir atvinnulífsins beint við nám, sem styrkir gagnsemi þess og áhrif.

Fræðslumiðstöð vann að nýjum áhersluverkefnum, meðal annars að ráðgjöf við innleiðingu raunfærnimats á háskólastigi og auknu alþjóðlegu samstarfi.

Skýr niðurstaða

Árið 2025 staðfestir að framhaldsfræðslan er ein af lykilstoðum menntakerfisins, fyrir fólk sem hefur ekki lokið námi á framhaldsskólastigi.  Hún eykur þátttöku á vinnumarkaði, styrkir hæfni og styður við samfélagslega inngildingu.

Það endurspeglast í orðum Ingu Sæland, mennta- og barnamálaráðherra, í ávarpi sínu um mikilvægt hlutverk Fræðslumiðstöð atvinnulífsins í íslensku samfélagi. „ Hún er sameiginlegur vettvangur aðila vinnumarkaðarins til að styrkja menntun fólks, hvort sem það er í starfi, í atvinnuleit eða í starfsendurhæfingu“.

En áskorunin er skýr: án aukinnar fjárfestingar í símenntun og skýrari stefnumótunar er hætta á að framhaldsfræðslan og það starf sem henni er ætlað að vinna nái ekki að fylgja eftir þeirri miklu eftirspurn sem nú blasir við.

Lesið ársskýrsluna hér:

Ársskýrsla Fræðslusjóðs er einnig komin út og hana má finna hér

Ársskýrsla Hæfniseturs ferðaþjónustunnar er einnig komin út og hana má finna hér