TENGJUM SAMAN – Fjölbreytileiki, lærdómur, vöxtur

Ársfundur Fræðslumiðstöðvar atvinnulífsins verður haldinn þann 13. nóvember n.k. á Grand hótel og er haldinn í samstarfi við NLL – Norrænt samstarf um símenntun og verður einnig streymt. Fundurinn hefst kl. 11 og stendur til 13:45, boðið verður uppá léttar veitingar.

Þema fundarins Tengjum saman – fjölbreytileiki, lærdómur, vöxtur vísar í að undanfarin ár hefur þátttaka innflytjenda aukist mikið innan framhaldsfræðslunnar og voru um 51%  þátttakenda í námi  með erlendan ríkisborgararétt árið 2024. Mest sótta námsleið FA var Íslenska og atvinnulíf. Flestir innflytjendur eru í starfi, en aðgengi að íslenskunámi eða tungumálastuðningi er misjafnt. Framhaldsfræðslan hefur unnið markvisst að því að ná til fólksins og símenntunarmiðstöðvar um land allt sjá um framkvæmd og útfærslur í takt við þarfir á hverju svæði fyrir sig í samstarfi við hagaðila. 

Á ársfundi FA verður varpað ljósi á þátttöku fólks með erlendan ríkisborgararétt í verkfærum framhaldsfræðslunnar. 

Dagskráin er áhugaverð en meðal annars mun Olga Orrit, sérfræðingur hjá Miðstöð fyrir færniþróun í umönnunargeiranum í Svíþjóð, fjalla um fyrirkomulag og árangur af tungumálastuðningi á vinnustað (Språkombud).  Sú aðferð hefur reynst vel þar í landi og hefur árangurinn sýnt sig meðal starfsfólks í gegnum aukinn tungumálaskilning, aukna vellíðan í vinnu, færri veikindadaga og minni starfsmannaveltu. Í dag eru um 4.500 manns sem hafa fengið þjálfun í tungumálastuðningi á vinnustað í Svíþjóð, en einnig er þessi aðferð er nú í útbreiðslu víðar en í Svíþjóð og með yfirfærslu yfir á aðrar starfsgreinar.  

Í tveimur pallborðum verður fjallað um annars vegar umgjörð og aðgengi að íslenskunámi og hins vegar hvernig námið fer fram út frá sjónarhorni atvinnulífsins. 

Að lokum segja fyrirmyndir í námi fullorðinna frá reynslu sinni af verkfærum framhaldsfræðslunnar og fá viðurkenningu fyrir sína frammistöðu. 

Skráið ykkur á fundinn hér: