Ársritið Gátt

	Ársritið Gátt
	Markmið ársritsins er að efla umræðu um fullorðinsfræðslu og starfsmenntun á Íslandi. Enn fremur safna saman og miðla reynslu og kynna það sem efst er á baugi í kennslufræðum, kenningum, námsleiðum, nýjum bókum, gögnum, tækjum og vefsíðum.
	_______________________________________________________________________________
	GÁTT 2009
	Meginefni ritsins er erfið staða á vinnumarkaði og úrræði sem hægt er að grípa til. Hvað einkennir íslenskan vinnumarkað? Hvernig geta fræðsluaðilar mætt þörfum atvinnuleitenda fyrir færniþróun? Hvernig hefur staðan á vinnumarkaði þróast? Hvernig vegnar eldri borgurum í lífi og starfi? Í ritinu eru einnig almennar greinar um fullorðinsfræðslu, kennslufræðilegar hugleiðingar út frá athyglisverðri bók og umfjöllun um viðmið um íslenskt skólakerfi, spá um vinnuafls- og færniþörf í Evrópu fram til 2020 svo að fátt eitt sé nefnt. Í ritinu er fjallað um raunfærnimat og sólskinssögur nokkurra einstaklinga sem hafa fengið mat á færni sinni. Í ritinu eru einnig  þátturinn Hvað áttu við? Í honum eru settar eru fram tillögur um skilgreiningar og þýðingar á íðorðum sem varða nám fullorðinna og starfsmenntun. Þá er greint frá starfsemi FA og verkefnum sem unnið hefur verið að á árinu 2009.
	_______________________________________________________________________________
	GÁTT 2008
	Markmið ritsins eru sem fyrr að efla umræðu um fullorðinsfræðslu og starfsmenntun á Íslandi, miðla reynslu og kynna það sem ber hæst í umræðunni hverju sinni. Markmið FA er að í Gátt birtist úrval greina um hvaðeina sem varðar nám og fræðslu fullorðinna. Ritið er ætlað víðum hópi í samfélaginu: Þeim sem stjórna og vinna að fræðslumálum, leiðbeinendum, kennurum og námsmönnum og síðast en ekki síst öllum öðrum sem hafa áhuga á að kynna sér nýjungar og helstu sjónarmið í fræðslu fullorðinna.
	_______________________________________________________________________________
	GÁTT 2007
	Um leið og 5. starfsári Fræðslumiðstöðvar atvinnulífsins er fagnað þykir tilhlýðilegt að líta um öxl og reyna að leggja mat á hvað áunnist hefur. Í þetta skipti er rauði þráðurinn mat í orðsins víðasta skilningi. Mat á frammistöðu, mat á árangri, mat á ávinningi, mat á raunfærni og svo mætti lengi telja. Greinarnar sem birtast í ritinu endurspegla þemað. Reynt er að svara spurningum eins og hvort á Íslandi sé símenntunarþjóðfélag? Hvernig er hægt að meta hvað er gott námsefni? Hvernig er ávinningur af námi metinn? Hvernig er færni og þekking sem fólk hefur aflað sér með ýmsum hætti í lífinu eða raunfærni metin? Hvaða áhrif hefur raunfærnimat á einstaklinga og líf þeirra? Hvaða áhrif hefur það á líf einstaklinga að hefja nám að nýju eftir áratuga hlé?
	_______________________________________________________________________________
	GÁTT 2006
	Í ritinu að þessu sinni er kynning á starfsemi Fræðslumiðstöðvarinnar og verkefnum á hennar vegum en rauði þráðurinn í umfjölluninni er námsnálgun út frá fjölbreytileika. Í markhópnum, sem okkur er ætlað að liðsinna, gætir ýmissa grasa, þar eru bæði harðgerir runnar, litrík, innflutt blóm og viðkvæmar hálendisplöntur. Sum okkar læra best í hljóðum lestrarsölum, önnur við undirleik tónlistar af ýmsu tagi og þriðja hópnum tilheyra þeir sem er sama um hvort undirleikurinn er Ísland í bítið, popptónlist eða Kastljósið. Sumir læra á nóttunni, aðrir á morgnana og margir hvenær og hvar sem þeir hafa tækifæri til. Þörfum flestra er hægt að mæta með margbreytilegum aðferðum og kringumstæðum. Þær eru jafn mismunandi og litirnir í regnboganum. Reynum að nálgast viðfangsefnin á breytilegan hátt, vera opin fyrir ólíkum aðferðum og tilbúin til að mæta nýjum kringumstæðum með opnum huga.
	_______________________________________________________________________________
	GÁTT 2005
	í þessu tölublaði ritsins er kynning á starfsemi Fræðslumiðstöðvarinnar á árinu auk alhliða umfjöllunar um fullorðinsfræðslu á Íslandi. Rauði þráðurinn er umfjöllun um kennslufræði fullorðinna. Reynt er að nálgast viðfangsefnin á sem fjölþættastan hátt; Hvaða aðferðum er best að beita við að nálgast skammskólagengna og hvetja þá til náms? Læra fullorðnir öðruvísi en börn og unglingar og hvaða leiðir er best að fara til þess að mæta þörfum fullorðinna námsmanna. Eru kennsluaðferðir sem samþætta þjálfun á persónulegri færni við þekkingaruppbygginu vænlegar við starfsmenntun? Þessar spurningar eru allar dæmi um það sem greinahöfundar leitast við að svara.
	_______________________________________________________________________________
	GÁTT 2004
	Í þessu fyrsta tölublaði er kynning á Fræðslumiðstöðinni en rauði þráðurinn í umfjölluninni er kynning á hugmyndum um raunfærnimat, verkefni sem við teljum að verði umfangsmikið í starfsemi FA á næstunni. Með því opnast möguleiki fyrir þann stóra hluta vinnandi fólks, sem býr yfir starfsreynslu, félagslegri færni og þekkingu en ekki formlegri menntun, til þess að fá raunfærni sína metna og skjalfesta. Með því að hlú þannig að einstaklingum fá þeir tækifæri til þess að takast á við ný verkefni í vinnu og námi. Atvinnulífið hagnast og verður hæfara í samkeppninni. Samfélagið nýtur góðs af hvoru tveggja, hagsæld eykst og ánægja allra.