Samstarf um menntunarúrræði - fundargerðir

Staðan á vinnumarkaði: Atvinnuleysi í febrúar og mars var um 9,3%. Spár gera ráð fyrir lækkandi atvinnuleysi í sumar og það verði um 7,5% í september. Dregið hefur úr skráningum hjá þeim einstaklingum sem hafa meiri menntun á meðan skráningar aukast hjá verkafólki og starfsfólki í þjónustu- og afgreiðslustörfum. Heldur hefur dregið úr skráningum í opinbera geiranum  eftir talsverða aukningu þar síðustu mánuði. Umtalsverð hreyfing hefur verið á atvinnuleysisskránni á milli mánaða, þ.e. talsvert um nýskráningar og afskráningar. Í mars voru nýskráningar u.þ.b. 1.700 á meðan afskráningar í mars voru um 1.600. Um 55-60% af þeim sem hafa verið afskráðir hafa fengið vinnu og er töluverð hreyfing á vinnumarkaðnum í dag.

Raunfærnimat: Sagt frá því að tölfræði úr starfi Fræðslumiðstöðvar atvinnulífsins sé nú aðgengileg á vef FA. Þar er að finna tölur úr: náms- og starfsráðgjöf, vottuðum námsleiðum og raunfærnimati. Umræður verða um þann  góða árangur sem hefur orðið í raunfærnimatinu á síðustu árum en margir horfa til þeirra hluta sem Íslendingar hafa verið að gera þar. Ljóst þykir að niðurskurður hjá hinu opinbera muni bitna á þeim sem koma úr raunfærnimati og ætla sér í framhaldsskólana þar sem nemendur í grunnskóla eru forgangshópur.

Námsráðgjöf á vefnum: Sagt frá fundi með erlendum náms- og starfsráðgjöfum hjá menntamálaráðuneytinu þar sem þeir kynntu möguleika á vefráðgjöf. Þar kom fram að sú lausn að bjóða fram ráðgjöf á vefnum hefur komið ágætlega út og er mun ódýrari leið en einstaklingsviðtölin. Fræðslumiðstöð atvinnulífsins mun skoða möguleika á námsráðgjöf á vefnum í samstarfi við Háskóla Íslands. Kannað verður vel hvaða efni sé til, áhugapróf o.fl. Sagt frá dönskum vef þar sem sé að finna ýmislegt um menntun, störf, námskeið, nám o.fl. www.ug.dk.